Требуется для просмотраFlash Player 9 или выше.

Статистика сайта

С. Шматаў (справа) віншуе пераможцаў.

Стала добрай традыцыяй на Браслаўшчыне ва ўрачыстай абстаноўцы падводзіць вынікі раённага спаборніцтва ў народнагаспадарчым комплексе, сацыяльнай сферы, ушаноўваць людзей, якія сваёй шчырай працай у розных галінах заслужылі павагу і прызнанне.

Урачыстасць з гэтай нагоды адбылася ў мінулы аўторак у Відзаўскім Доме культуры. На сцэну вядучыя за-прасілі старшыню райвыканкама Сяргея Шматава. Ён яшчэ раз падкрэсліў, што, нягледзячы на фінансавыя складанасці, неспрыяльныя кліматычныя ўмовы, іншыя фактары, многія працоўныя калектывы і асобныя работнікі дабіліся добрых вынікаў і тым самым унеслі свой уклад у скарбонку працоўных дасягненняў раёна.

Заслугі галоўнага ўрача ЦРБ Аляксандра Макарэвіча і начальніка цэха па адкорме свінакомплексу СВК «Маяк Браслаўскі» Галіны Цыўнель адзначаны ганаровым званнем «Чалавек года Віцебшчыны». На раённым мерапрыемстве яны яшчэ раз пачулі віншаванні ў свой адрас і атрымалі букеты кветак.

У розных сферах дзейнасці плённай працай і высокімі паказчыкамі вызначыліся і сёлетнія лаўрэаты звання «Чалавек года Браслаўшчыны» – аператар машыннага даення СВК «Маяк Браслаўскі» Марыя Дарый, начальнік ДРБУ-142 Анатоль Пліско і дырэктар СШ №1 Браслава Тамара Стома. С. Шматаў уручыў ім дыпломы, кветкі і павязаў чырвоныя стужкі.

Затым на сцэну Відзаўскага ДК выходзілі кіраўнікі, спецыялісты сельскагаспадарчых і прамысловых прадпрыемстваў, сферы адукацыі, культуры, гандлю, медыцынскага абслугоўвання, транспарту, прадпрымальнікі, маладыя спецыялісты. Яны атрымалі ў гэты дзень шмат віншаванняў, станоўчых уражанняў, пераходныя чырвоныя сцягі, дыпломы, кветкі. Сапраўднае сузор’е розных узнагарод чакала кіраўніцтва, галоўных спецыялістаў і працаўнікоў СВК «Маяк Браслаўскі». І гэта заслужана, бо гаспадарка з’яўляецца лідарам сельскагаспадарчай галіны ў раёне, а людзі, якія там працуюць, памнажаюць дабрабыт не толькі сельгаспрадпрыемства, але і ўсяго раёна.

Затым заслужаныя ўзнагароды з рук старшыні райсавета дэпутатаў Ніны Пучынскай атрымалі пераможцы спаборніцтва сярод органаў мясцовага самакіравання. У намінацыі «Лепшы сельскі Савет дэпутатаў» іх атрымала старшыня Опсаўскага сельсавета Ала Даніліна, а таксама лепшыя старэйшыны Валянціна Папкова, Ганна Шыліна, Таццяна Зянкова.

Як звычайна, перад пачаткам урачыстасці прамысловыя прадпрыемствы горада – хлебазавод, «ВТЦ г. Браслаў», райспажыў – арганізавалі дэгустацыю сваёй прадукцыі. Навінкі можна было не толькі пакаштаваць, але і набыць.

Парадавалі сёлета і работнікі культуры, якія падрыхтавалі цудоўны святочны канцэрт. Самадзейныя артысты з Браслава, Дрысвят, Слабодкі, Ахрэмаўцаў падарылі пераможцам спаборніцтва добрыя песні, танцы і прыўзняты настрой, за што гледачы аддзячылі апладысментамі.

Зінаіда Палулех, фота аўтара.