У мінулую суботу ў вёсцы Забор’е Расонскага раёна адбыўся традыцыйны фестываль сельскага турызму. Сярод размаітых «гасцінных двароў» з песнямі-танцамі, беларускімі народнымі прысмакамі, ткацкімі, рамеснымі ды іншымі вырабамі размясціўся і перасоўны падпісны пункт «Народнага слова». Наша газета прычынілася да агульнага свята і правяла «Дзень падпісчыка «НС» сярод гаспадароў і гасцей «Заборскага фэсту».
Ён яшчэ раз пацвердзіў, што наша газета мясцовым жыхарам добра знаёмая, а для многіх – адзіная, якой яны верныя многія гады. Людзі падыходзілі, гарталі апошнія нумары, дзяліліся сваімі поглядамі на жыццё і прасілі часцей бываць і болей пісаць пра Расоншчыну і справы яе людзей, падказвалі канкрэтныя адрасы.
Першай нашай падпісчыцай у суботні дзень у фестывальным Забор’і стала прадавец Вольга Картавенка. Вольга Міхайлаўна разам са сваім мужам, які працуе лесніком, да таго ж з нядаўняга часу сталі гаспадарамі сельскай сядзібы «ОльГенА», што гасцінна прымае аматараў здаровага адпачынку адразу ж на ўездзе ў Забор’е. На фестывалі муж з жонкай прэзентавалі сваю сядзібу і частавалі ўсіх прысмакамі ўласнага гатунку. Ад «Народнага слова» Вольга Картавенка, як і іншыя падпісчыкі ў той дзень, атрымала падарунак – сувенірны кубак з лагатыпам газеты...