Требуется для просмотраFlash Player 9 или выше.

Статистика сайта

У панядзелак, 25 лютага, Папа Рымскі Бенедыкт XVI прыняў прашэнне аб адстаўцы біскупа Віцебскага Уладзіслава Бліна.

Нягледзячы на тое, што нарадзіўся і большую частку жыцця правёў у Польшчы, ксёндз Уладзіслаў, калі прыехаў у 1989 годзе на радзіму продкаў, распачаў актыўную працу па адраджэнні тут рэлігійнага жыцця, актыўна ўводзіў у жыццё касцёла беларускую мову. У 1992 годзе ён арганізаваў у Магілёве Міжнародны фестываль духоўнай музыкі «Магутны Божа», які стаў традыцыйным. У 1999 годзе стаў першым біскупам новастворанай Віцебскай дыяцэзіі. За гэты час значна павялічылася колькасць каталіцкіх парафій, асабліва ў найбольш пацярпелых у часы ваяўнічага бязбожжа ўсходніх раёнах вобласці. У 2006-м Уладзіслаў Блін стаў лаўрэатам прэміі «За духоўнае адраджэнне» за актыўную дзейнасць у гуманітарнай сферы, а сёлета такую ж узнагароду атрымаў і кіраўнік дабрачыннай місіі «Карытас» Віцебскай дыяцэзіі Уладзіслаў Кульпекша.

Кіраўнік касцёльнага суда дыяцэзіі а. Віктар Місевіч паведаміў нашай газеце, што прычынай адстаўкі іерарха стала пагаршэнне здароўя. Зараз ён праходзіць курс лячэння ў адным з амерыканскіх шпіталяў. У тэлефоннай размове з папскім нунцыем Клаўдыё Гуджэроці ксёндз-біскуп Уладзіслаў перадаў прывітанне вернікам Віцебшчыны і выказаў гарачае жаданне быць з імі ў найбліжэйшы час, каб адслужыць развітальную імшу.
Апостальскім адміністратарам Віцебскай дыяцэзіі Святы пасад часова прызначыў яе генеральнага вікарыя Францішка Кісяля. Ураджэнец Глыбоччыны, ён быў пробашчам касцёла ў Браславе, а з 1992 года прысвяціў сваю дзейнасць вернікам парафіі Андрэя Баболі ў Полацку, дзе адбудаваў касцёл, а таксама заснаваў парафію Найсвяцейшага Сэрца Езуса ў Наваполацку.

Алесь Бынькоў, «НС».