Требуется для просмотраFlash Player 9 или выше.

Статистика сайта

На XVIII Мінскім міжнародным кніжным кірмашы-выставе ў павільёне «БелЭкспа» 9 лютага адбылася прэзентацыя зборніка Пятра Сіняўскага «Зачараваная гаспадарка. Казкі гаспадара Пятра з-пад Полацка». Шматлікіх наведвальнікаў з кніжкай пазнаёміў дырэктар выдавецтва «Мастацкая літаратура», вядомы беларускі пісьменнік  Віктар Шніп, бо менавіта там на пачатку года яна пабачыла свет. Наклад – 2,5 тыс. асобнікаў, афармленне  мастачкі Алены Каратаевай. І на XIV Вільнюскім міжнародным кніжным кірмашы, які прайшоў з 21 па 24 лютага ў выставачным цэнтры  «LitEXPO», у ліку больш за 500 беларускіх выданняў быў таксама прадстаўлены гэты адметны зборнік.

У ім 13 казак. Раней яны друкаваліся паасобку ў абласной і рэспубліканскай перыёдыцы, літаратурных часопісах «Маладосць», «Бярозка», калектыўных зборніках «Цвіце верас» (1987 г.), «Бацькаўшчына» (1997), «Пакліч у госці сонца» (2012). Віцебскі тэатр «Лялька» паставіў удалы спектакль па п’есе-казцы «Сказ пра Гаўрылу з-пад Полацка». Паводле казак П. Сіняўскага былі створаны пастаноўкі на рэспубліканскім радыё, для «Калыханкі» на тэлебачанні, мультфільмы «Зачараванае кола» і «Пустое і парожняе». А казку, якая дала назву гэтаму зборніку, чатырохкласнікі вывучаюць у «Беларускай чытанцы».

«Янкава крынічка», «Пра вучонага сына і мудрага бацьку», «Як Гаўрылка пана са свету зжыў», «Фількава грамата» (памяці Уладзіміра Караткевіча), «Казка-быль, як будаваў хатку Базыль», «Адкуль вёска Пустапарожняя» – гэтыя і іншыя казкі ўражваюць трапнай, сакавітай мовай. «Казку казаць – не снапы вязаць. Языком малоць – што моркву палоць. Калі ёсць ахвота, сядай каля плота, слухай, матай на вус… Жыў ды быў адзін беларус. Багацце меў, бо стаяў ля хаціны хлеў. Тут жа пуня для сена, на дровы павець. Што яшчэ трэба мець?». Вандроўкі казачных герояў у пошуку шчасця, прыгоды і дзівосы, якія з імі здараюцца, захопяць у свой фантазійны палон і дарослых, і маленькіх чытачоў.

Аўтар казак – ураджэнец старажытнага Полацка. Вучыўся ў Гарадоцкім сельгастэхнікуме, Рыжскім вучылішчы грамадзянскай авіяцыі, на журфаку Белдзяржуніверсітэта. Працаваў у раённым і абласным друку, у тым ліку ў «Народным слове». Нашага калегі Пятра Сіняўскага не стала ў лютым 2008 г. Ён памёр ад цяжкай хваробы на 62 годзе жыцця на Міёршчыне – у любімай пры-азёрнай вёсцы Язна, дзе прайшло дзяцінства і куды разам з жонкай Саламеяй Антонаўнай перасяліўся з Віцебска. Зараз яна і дбае пра літаратурную спадчыну мужа-казачніка. Зборнік – таму пацверджанне.

«Варта прыгубіць гаючай вады з яго казачных крыніц, каб зразумець – вада гэта жыццядайная, жывая. Казкай Пятро Сіняўскі дапамагае сучаснікам спасцігнуць свет і месца ў гэтым свеце кожнага з нас», – зазначае ў «Слоўку пра аўтара» зборніка беларуская пісьменніца Алена Масла. Пачытаўшы яго, пагаджаешься з яе думкай.

Галіна Шпакоўская, «НС». Фота з асабістага архіва С. Сіняўскай.