Требуется для просмотраFlash Player 9 или выше.

Статистика сайта

Багатым на падзеі выдаўся сакавік – канцэрты і народныя гулянні, спартыўныя спаборніцтвы і фестывалі творчасці, конкурсы прыгажосці. І ў гэтай феерыі талентаў знаёмай настальгічнай мелодыяй прагучаў 12-14 сакавіка ў Оршы фінал абласнога конкурсу маладых выканаўцаў патрыятычнай песні.

На працягу многіх гадоў гэты конкурс служыць мэце выхавання моладзі на лепшых узорах песеннага жанру мінулай эпохі. Сёлета ён адбыўся ў 19 раз і аб’яднаў на адной сцэне 23 удзельніка ва ўзросце 16-31 год (18 салістаў і 5 вакальных калектываў) з Віцебска, Оршы, Полацка, Наваполацка, Докшыцкага, Глыбоцкага, Дубровенскага, Лепельскага, Чашніцкага, Шумілінскага, Бешанковіцкага, Аршанскага і Полацкага раёнаў. 
Ваенныя, патрыятычныя, рамантычныя песні беларускіх і замежных аўтараў стваралі добрую, сяброўскую атмасферу, што адзначылі і самі ўдзельнікі, і аўдыторыя, і арганізатары разам з журы на чале з дырэктарам Віцебскай абласной філармоніі Аленай Падаляк.

Гран-пры конкурсу адзінагалосна аддалі Лявону Кехваяну з Наваполацка за пранікнёнае і таленавітае выкананне песень «Эх, дороги» и «Go down, Moses» (з рэпертуару Луі Армстранга).

У намінацыі «Салісты» першае месца падзялілі Мікалай Расянок з Віцебска і Зміцер Лагун з Полацкага раёна. Лаўрэаты другой прэміі таксама два выканаўцы – Андрэй Чабан (Докшыцкі раён) і Мікалай Камянкоў (Наваполацк). Трэцім стаў Віталь Хаданёнак (Полацк).     

Сярод вакальных калектываў лепшым прызнаны дуэт з Докшыцкага раёна – Андрэй Чабан і Андрэй Воранаў. На другім месцы квартэт народнай студыі эстрадных спеваў «Крэатыў» (Орша), на трэцім – дуэт Аляксандра Падвіцельскага і Кацярыны Мацулевіч з Рассонскага раёна.

Не пакінулі без узнагарод і астатніх удзельнікаў, многія з іх атрымалі спецыяльныя дыпломы і прызы ў розных намінацыях.

Арганізатары, сярод якіх упраўленне культуры, аддзел па справах моладзі аблвыканкама,  аддзел па справах моладзі Аршанскага гарвыканкама, Аршанская дыстанцыя грамадскіх будынкаў УП «Мінскае аддзяленне БЧ», ТАА «Тэлеком-Гарант», зрабілі ўсё, каб канкурсантам і гледачам фестываль запомніўся толькі з лепшага боку.
Сюрпрызам гала-канцэрта стала сумеснае выкананне ўсімі ўдзельнікамі песні «Замыкая круг», тэкст якой яны чыталі… з мабільных тэлефонаў. Хто ведае, можа, праз некалькі гадоў гэты конкурс будзе падтрымлівацца онлайн-трансляцыяй і інтэрактыўным тэле- ці інтэрнэт-мастом цераз дзяржаўныя межы, акіяны і адлегласці?

Кацярына Князева, «НС».