Пасля даволі працяглага перапынку Віцебшчыну з сольнымі канцэртамі наведаў экс-музыкант гуртоў «Палац» і «Крыві», лідэр і кіраўнік каманды «WZ-Orkiestra» Зміцер Вайцюшкевіч. Выканаўцу, які грае ў стылях рэтра, рок, гарадскі шансон і іншых, цёпла сустракалі ў Оршы і Гарадку...

У мінулую суботу католікі Віцебска ладзілі традыцыйную штогадовую працэсію, што прымеркавана да ўрачыстасці Цела і Крыві Хрыста. Асаблівую ўзнёсласць сёлетняму святу надало тое, што ў сваім шаноўным узросце ў наш горад прыехаў адзіны беларускі кардынал Казімір Свёнтак. Сотні вернікаў пад моцным дажджом сабраліся каля касцёла Езуса Міласэрнага, што на вуліцы Воінаў-інтэрнацыяналістаў абласнога цэнтра. Ад іх імя віцебскі біскуп Уладзіслаў Блін вітаў высокага госця, які і адслужыў літургію. Дарэчы, ксёндз-кардынал нядаўна адзначыў 70-годдзе святарскай дзейнасці. У сувязі з гэтым былі зачытаны віншаванні ад Папы Рымскага Бенедыкта ХVI і Прэзідэнта Беларусі Аляксандра Лукашэнкі...

«Зямля – аснова ўсёй Айчыне» – пад такой назвай у абласным мастацкім музеі працуе выстава з фондаў Літаратурнага мемарыяльнага музея Якуба Коласа. Там прадстаўлены асабістыя рэчы, рукапісы, фота- і жывапісныя партрэты класіка, пейзажы, выкананыя рознымі мастакамі ў любімых коласаўскіх мясцінах. А ў мінулую суботу экскурсію па гэтай экспазіцыі правёў малодшы сын слыннага беларускага песняра Міхась Міцкевіч. Ён завітаў у Віцебск разам з дырэктарам коласаўскага музея Зінаідай Камароўскай, пісьменнікам Генрыхам Далідовічам, загадчыкам аддзела культуры Стаўбцоўскага райвыканкама Мінскай вобласці Анатолем Грэкавым і самадзейнымі артыстамі – усе гадаванцы роднага Коласу кутка. На сустрэчу з імі прыйшлі віцебскія літаратары, работнікі культуры, мастакі, акцёры, студэнты, школьнікі. Вядома ж, у цэнтры ўвагі быў Міхась Канстанцінавіч Міцкевіч – доктар тэхнічных навук, лаўрэат Дзяржаўнай прэміі Беларусі, аўтар шматлікіх навуковых прац па тэхналогіі апрацоўкі матэрыялаў. 56 гадоў ён адпрацаваў у фізіка-тэхнічным інстытуце Нацыянальнай акадэміі навук Беларусі, а зараз – навуковы супрацоўнік гэтага Літаратурнага музея, член рэдакцыйнай калегіі 20-томнага выдання твораў Якуба Коласа (шэсць тамоў ужо выйшлі з друку), нястомны прапагандыст беларушчыны. Знешне ён вельмі падобны на свайго славутага бацьку...